Kawl ralkap cozah thalo nih thong an thlak mi US rammi asi mi Nyi Nyi Aung cu nihin ah thong in in an thlah thancang.

Taza zung nih kum nga thongthlak ding tiah bia an rak khiah mi kha atu hi thlakhat a vun rauh hnu ah an vun thlah than mi a si tiah Yangon i American palaizung nih thong an thanh.

Nyi Nyi Aung hi nikum September thla ah khan Kawlram a va tlawnnak ah Yangon, Mingaladon airport ah an tlaih thong an thlak mi a si.

Nyi Nyi Aung hi The New York Times nih cun a 'naturalized American citizen' timi biafang hmang in an ttial. A sullam cu American rammi siter chawm mi tinak si. Aung San Suh Kyi inn ah athli in a va kal mi midam lo William Yettaw an tlaih lio ah khan cun 'American Citizen' ti lawng in an hman mni hmuh khawh si. Citizen v eve ah an I lo deuhvak lo maw tin biahal awk hna avan um. Yettaw cu American ram ah a chuak mi mirang a si I, Nyi Nyi cu citizen asawk i citizen ah aicang mi a si. Yettaw thongtlak lio ah hin US cozah i min ngei upa hna nih an kal hnawh i an chanh cawlh. Nyi Nyi Aung hi ahomanh nih vakal hnawh I chawnh mi a um lo.

Vawlei cung ah a um bal rih lo mi, angan bikmi ruakhawtlak lam Mizoram ah an lam i mah cu Guinness World Record nih theihpi a si. Vawlei cung ah a ngan bik mi ruakhawtlak lam, Mizo holh in cun 'Cheraw' tiah an auh. Tuthla ni 12 ni ah khan Mizoram khua lipi Aizawl khua ah mah tin lamnak cu sunglawi emem in an tuah mi cu a si. BBC thawngpang nih siseh, Guinness World Record website nih siseh mah hi kawng hi ropui tak in an ttial.

Aizawl khualipi lamthluan ah Mizo thilthuam dawhdawh ai hruk mi ngaknu tlangval, mino upa tiin an i pung lulh i vawlei cung um balrih lo mi nunphung lam pakhat cu an vun langhter. Mah hi lam a lam mi hna hi a milu in 10736 an si. Thawnghra renglo minung nih lam pakhat rual tein an lam tti khawh tihi khuaurah har thil pakhat cu a si. Lam sawh sawh si lo in, ruakhaawtlak a si, rua khawn ning, hlaw aw he i rual ding in ke kar ning le i hlirh thuining hna ruang tak in an lawm khawh mi hi khuaruah har thil a si ternak cu a si.

Karen nungak Zoya Phan cu World Economic Forum timi vawlei cung chawlehnak foram nih vawleicung mino hruaitu timi Global Young Leader min thatnak pek ding caah thim asi. A nih hi tleicia Karen miphun hruaitu Phado Man Sha i a fanu a si.