Japan nih Thailand ram Mae La refugee camp ah a um mi Kawlram mi ralzam 90 cu Japan ramah lak ding ah December 2008 ah khan timhtuahnak an rak ngei. Mah cu an timh mi hna cu tukum September thla ah hin an za tein Japan ah lak dih ding a si.

Mae La refugee camp i ralzam hna cu UNHCR nih interview an tuah cuah mah hna i camp ah an umnak a sau le tawi cung ah zoh chih in lak ding ah timh tuahnak an ngei. Thailand ram, Mae La refugee camp ah hin micheukhat cu kum kul dengmang an um cang i an caah ramthatnak kalkhawhnak lam an rak ngei kho lo.

Mae La refugee camp cu vawlei cung ah Kawlram in ralzam a rak sawk mi ralzam hna hmunkhat te ah a tam bik an umnak camp a si ti si. Thailandramchung ah hin refugee camp 9 a um i, an za tein Kawlram ramri he aa naihnak hmun ah an um dih. 2005 kum thawk khan Thailand ram i ralzam hna caah ram tha deuhnak ah pemkhawhnak lam a vun um hnu in ralzam 55000 cu ramthumnak ah kuat an si cang ti asi. Mae La refugee camp lawng bak hin minung 20000 renglo cu ramthumnak ah an kuat cang hna ti a si. Cu hna lak ah a tam u cu Karen le Kareni miphun an sihna i US ram ah tambik an kal i mi cheu cu Australia le Canada zong ah an panh ve ti asi.

Atu ah Japan ram nih ralzam an vun lak khawh ve tik ah Asia ram ah ralzam a la kho mi ram hi Japan ram pakhat lawng a si rih. Atu an lak hmasa mi hna hi zoh chih in hmai lei ah ralzam lak ding le lak lo ding cu Japan cozah cung bak ah a um tiah Thailand UNHCR zung i Andrej Mahecic nih a chim.  Mah h  program hi three year pilot project tiah an auh i, kumkhat ah Kawlram ralzam 30 lengmang in lak ding caah an timh tuah mi a si.