UN nih Kawlram ah palai an thlah lengmang hna nain UN palai hna nih thil anchuahpi kho taktak mi tutiang ah aum kho bal rih lo. 2008-2009 kum hna caah Ibrahim Gambari cu UN palai ah an rak thlah nain thilpipa achuah lanh kho lo. UN lutlai Banki Moon pumpak zong in Kawlram ah a kal i ralbawi hna a ton hna nain a biachim mi cu Kawl ralkap nih zei an rel piak hlei lo.

Tutan an thlah mi hi Tomas Ojea Quintana ti a si i a nih hi tulio UN zung i nuhrincovo lei he pehtlai in tuanvo ngeitu upa pakhat asi i Kawlram ah nuhrin covo aumloning hna he pehtlai in siseh ramkhel rian kawng caah siseh palai in an vun thlah mi a si.

February 13 ni ah Yangon ah aphan. VOA nih a chimnak ah cun atu Mr. Quintana Kawlram a tlawnnak aruang bik cu tlangcung mi upa hna le opposition party hna aralai mi election ah an itelve khawh ding caah chimhchawnnak ngeih ding ah ai tinh bik mi asi. Cun Nobel laksawng ahmu kho mi Aung San Sukyi he zong i ton khawhnak ding caah timhtuahnak he Kawlram ah a vapanh cu a si. Ni 5 chung Kawlram ah caam ding in a pawk i a mah Yangon a phak hlan nikhat ai duh ah ralkap nih NLD upa U Tin Oo cu hrenkhumhnak in an thlah. Nain atu a mah a caam cuah mah lio zong ah hin Kawlralkap nih ramkhel riantuan mi nutung pa 4 cu thong an thlah chap bei rih hna ti si.

Mah hi nutung pa 4 hna hi Shwedagon Pura cung ah Aung San Sukyi luatnak ding caah thla a cam tawn mi an si i, ralkap nih nikum October thla ah khan an tlaih hna i thong an thlak cang hna. Tu Quintana arak lio celngel ah hin biaceihnak an tuah i rianhrang he thongthlak ding in bia an khiahpiak hna ti si.

NLD biachimnak nawl ngeituk U Nyan Win nih cun "UN i nuhrin covo caah riantuan mi Kawlram a tlawn lio hmanh ah ralkap nih nuhrin covo duhtawk in an buar rih ko" a ti.

London ah um mi Amnesty International timi nuhrin covo caah riantuan mi bu nih Kawlram chung ah kum 2 chung bak biatak tein dothlatnak an tuah khawh in "Kawlram chung ah nuhrin covo buarnak le tlangcung mi hna cung ah namnetnak le hremnak tampi a um rih ko." tiah an chim.