US ram ah a cang bal rih lo mi thil pakhat a si mi nihin ah a cang. US ram mi asi i mirang asi mi Mr. Joe Stack (kum 53) nih US cozah cung ah lungtling lonak a ngeih mi aum caah vanlawng fate pakhat ai mawngh i cozah zung pakhat cu attaih. Mah bantuk thil acaannak hi Austin khua Texas ah a si i, tuzing zinglei suimilam 10 hrawng ah a cang mi thil a si. Joe Stack hi vanlawng a mawng mi pilot pakhat asi.

Anih hi US cozah cung ah a duhlonak vialte a Website (Embeddedart.com) cung ah attial lengmang i ahmuh ning tampi website cung ah cun attial dih. Nain a website hi nihin bak ah FBI nih an kham cawlh i zoh awk a tha ti lo.

Zeiruang ah dah amah le mah taitai thilak in aa tuah i US cozah zung pakhat vanlawng in a vasuk ngam hnga tihi biahal awk a um rih. Cun mah tihin vanlawng ai mawngh hlan ah aumnak in cu mei in a khanghta rih.

FBI nih rau lo tein amah a si kha an thanh khawh cawlh i aruak belte an hmu zok kho lo. Chun hnu deuh lawng ah a ruak an hmuh khawh.

Atu vanlawng nih a pah mi IRS zung hi dot 9 asang i thlalang vampang in an kham mi office ngan ngai mi a si achung ah cozah riantuantu 100 renglo rian antuannak a si.

Mr. Stack hi an inn mei in a duah hlan, vanlawng in ai thawh hlan te ah zing lei 9:12am ah cozah dohnak ca cheukhat a ttial ta.

Mah bantuk in vanlawng hmang in State khualipi pakhat i cozah office pakhat asi mi a vun suk kho mi an um rih tik ah US cozah caah himnak a um khawh lo ning a fianter ngai rih tihi hmuh khawh sii. Nuclear in vuntu hna seh law an kham khawh ding hi mang manh mi a lo rih.

Vanlawng in a suknak zungchung riantuan tuhna tamngai an i hliam nain a thi mi cu tu tiang ah theih mi a um rih lo. Sizung ah an phan mi cu dozen hnih renglo an si ti a si i, minung pakhat cu an hmu kho rih lo ti si.