US ram hruaitu Obama nih Patriotic Act cu kumkhat sauter than ding caah February ni 27 ni ah khan min a thut than.Mah Patriotic Act hi 9/11 lio i New York i World Trade center mithalo hna nih an hrawh khawh khan an vun tharchuah mi a si. Mah hi nawlbia an tuah mi hi a bik in immigration timi anramchung ah ramdang mi luhchuahnak ding kawng he aa pehtlai bik mi a si. Terrorist timi ralhrang thalonak dohnak le khamnak ding caah an i tinh bik mi a si.

Mah hi Patriotic Act hi October 26, 2001 lio ah President George W. Bush nih min arak thut i an fehter mi a si. Patriotic timi hi acronym pakhat a si i a sullam cu Providing Appropriate Tools Required to Intercept and Obstruct Terrorism Act of 2001 tin a si(Public Law 107-56). Mah hi Act, nawlbia ning hin biaceihzung nih nawlpek hau lo in FBI nih an herhnak paoh ah email siseh, telephone auh mi hna siseh dothlat khawhnak nawl an ngei.

Ralhrang thalohna kha phaisa pek hrim hrim lo ding tibantuk le adang dang thil tampi ai tel. Mah hi ruang ah hin rampkhat ah cozah a do cuah mah mi hna cu ralhrang thalo terrorist an si ee tiah ruahchihnak arak um caah Laimi tampi zong cu ralhrang simi CNF bawmhnak pek ruang ah US ram ah rak luh khawh lo in um a si. Asinain, Laimi hruaitu hna ttanrualnak le US ram cozah nih zangfah ruang ah CNF telh chih in Kawlram i hriamtlai he tlailo he bu cheukhat hna cu terrorist mincazin in luat a si. Cu tin zangfahpiak hlan exempt timi pek hlan ah cun Laimi ralzam hna tampi zong US luh khawh lo in rak um a si.

Obama nih min vun thu than hlah seh law mah hi Patriotic Act timi hi a caan a dih cang lai. Nain a tu min a vun thut than tik ah kumkhat vun sauh ter than mi a si. Mah hi Patriotic Act ning hin US rammi an si zong ah an telephone chawnhnak le email tiang dothlat dih khawh ding in an tuah mi a si i, a duh lo mi an tam ngai ve. Innrang biaruahnak meeting ah vote an pek ning in aduh tu 315 an um i a duh lotu 97 an um caah aduhtu nih an tei i cu ti cun Senate nih afehter than hnu ah President nih min a thut than mi cu a si.