Karen nungak Zoya Phan cu World Economic Forum timi vawlei cung chawlehnak foram nih vawleicung mino hruaitu timi Global Young Leader min thatnak pek ding caah thim asi. A nih hi tleicia Karen miphun hruaitu Phado Man Sha i a fanu a si.

Vawleicung ah mino hruaitu 5000 hna an min cazin an chuahpi hna hnu ah ram 72 in mino hruaitu hna an vun thimthan hna i mino hruaitu 197 an thimnak lak ah Zoya Phan cu Global Young Leader timi laksawng hmu dingin an thim mi cu a si.

Zoya Phan nih cun "Mah tiin an ka thim mi hi kei mah ca lawng ah si lo in, Kawl ram chung um tlangcung mi hna covo caah rian attuan cuah mah mi vialte hna le, Kawlram ah nuhrin covo alen khawhnak caah siseh, Democracy phunghram um khawhnak caah siseh rian atuan mi hna dihlak hna a kan philh lo tiah ka hmuh" a ti.

Amah pakhat lawng hi thimmi siloin laksawng hmu ding caah minung hi 197 an si i, an za tein Tanzenia ram ah Maythla ni 2 ni ah itonnak an tuah lai i, cu ka hmun ah cun Kawlram kawng chimnak hna ka ngei te lai ee tiah Zoya Phan nih Irrawaddy maivan inn ah a chim.

Mah hi World Economic Forum timi hi kum chiar vawlei cung ah mino hruaitu hna 200, 300 hrawng an thim lengmang hna i Vawlei cung deihnak kawng, thanchonak kawng, fimthiamnak le chawlehnak kawng he pehtlai in biaruahnak forum an tuahpiak lengmang hna i, mino hruaitu hna nih vawleicung thatnak caah rian antuannak ding caah a bawmchantu bu pakhat an si.

Zoya Phan hi atu lioah cun UK ram London ah a um i, Burma Campaign-UK timi Kawlram ramkhelrian caah rian a tuan cuah mah mi bu pakhat ah rian a bawm cuah mah mi pakhat a si. A nih hi Poe Karen (Rawn Karen) mi a si i, UK ram ah siseh vawlei cung ram tampi ah Kawlram caah riantuannak tampi a ngei cang mi mino asinain rian atuan kho ngai mi hruaitu pakhat asi. Burma Campaign-UK ah hin a nih hi ramdang he pehtlaihnak foreign relation a tlaih piak cuah mah mi a si.